Kryeministri i Shqipërisë, Edi Rama, kur kanë mbetur dhe pak orë nga fillimi i Asamblesë së Partisë Socialiste, ku dhe do të prezantohet qeveria e re, ka vijuar me rutinën e përditshme, duke uruar Mirëmëngjesi ndjekësit e tij në rrjetin social “Facebook”. Ai ka zgjedhur foto nga një koleksion i rrallë i artit shqiptar nga autorë si Odise Paskali, Zef Kolombi, Vangjush Mio, Vilson Kilica.
Gjithashtu, kreu i qeverisë ka njoftuar se “këto vepra janë tanimë pjesë e fondit të Galerisë Kombëtare të Arteve dhe në dispozicion për publikun si një ekspozitë e posaçme”.
“Ju uroj një ditë të mbarë me këto foto nga koleksioni i rrallë i thesarit të gjetur e të shpëtuar të artit shqiptar, me 66 vepra nga autorë të mirënjohur si Odise Paskali, Zef Kolombi, Vangjush Mio, Vilson Kilica etj. Pas restaurimit të plotë, këto vepra janë tanimë pjesë e fondit të Galerisë Kombëtare të Arteve dhe në dispozicion për publikun si një ekspozitë e posaçme,” shkruan Rama në Facebook.
